الإدمان ما مخدر بس

هديل محمد بخيت

إنت ممكن تدمن ضحكة ، نظرة ، صوت ، ممكن تدمن شخص ، و تدمن كل تفصيله فيه و تحبھا مھما كانت صغيرة وعادية .. لما تحب شخص لدرجة الادمان ما ح تحس انو اي حاجة فيه عادية و لا اي حاجة معاهو عادية، كل الحاجات المتعلقة بيه البتعيشه معاهو ح تحس ان ليھا طعم خاص و احساس مختلف عن اي حاجة عشتھا قبل كدة، مع انو ممكن مايكون أحسن شخص انت قابلتو في حياتك و ممكن كمان يكون عدى عليك احسن منو بكتيير، و فيھم مميزات عنو، لكن دا الانت حبيتو لدرجة الادمان، دا لمس قلبك و شال منو اي شخص كان موجود قبلو و ماساب فرصة لأي زول انو يجى بعدو، خلاك تعيش معاهو الحياة و الحب و المشاعر بطريقة مختلفة عن كل القابلتھم فى حياتك، الشخص دا بكون دخل قلبك واتمكن منك و حفظ كل تفصيلة تخصك و اتخصص احساسك و مشاعرك، باختصار بقى معاهو الكتالوج بتاع قلبك، عارف كويس انت محتاج شنو، وعارف كيف يحقق ليك دا و يفرحك، عارف كيف يخليك تعيش الحلم الطول عمرك اتمنيتو، الشخص دا نظرتو بتفرق كلمتو بتفرق، نبرة صوتو بتفرق، بيقدر فى لحظة انو ينسيك الدنيا بكل الفيھا و يدخلك العالم بتاعو هو، عالم هو البيرسم تفاصيلو.. الشخص دا بيخليك تعيش احلى لحظات ممكن تعيشھا فى حياتك، بس وقت ما يبعد ويروح، روحك بتروح معاهو، بيسحب الحياة من جسمك بفراقو، ما بتقدر تكمل الحياة من غيرو، ما بتعرف ترجع زي ماكنت قبل ماتعرفو، لان دا بيكون حُب عمرك و نصك التانى الغالباً قليل لما بتلاقيه و الحياة بتديك فرصة انك تشوفو و تقابلو .. عشان كدة لما تلاقى نصك التانى و حب عمرك اتمسك بيه اياك تتخلى عنو، لانك بكدا بتتخلى عن روحك بتتخلى عن جزء منك، وح تكمل عمرك كلو وانت ناقص روح وعايش بنص حياة..