معقول دا السودان الكانت اوروبا استعمرتو عشان المال والرجال؟

كتب/ هديل محمد بخيت

الحاصل في البلد دي يخلينا نعيد حسابتنا ونرجع ألف خطوة للخلف عشان نقدر نفهم الشئ البحصل دا.

معقول دا السودان الكانت اوروبا استعمرتو عشان المال والرجال؟ دا السودان بلد النخوة والرجولة والشهامة؟ دا السودان الكنا نفتخر بيه انو بلد حر متماسك؟ (يا اخوانا اللعب في عداد البلد دي منو؟ غايتو لو ما اكضب الشينه اقول في دوله حاااقدة ح اااا سده عامله لينا عمل رامياهو في المحيط الأطلسي عديييل كدا) مجتمعنا السوداني بقي مليان سلبيات لا تحصى ولا تعد كل يوم ظاهرة جديدة تخلينا نوطي رؤسنا من الخجل.

الناس نست انو في موت وفي قيامة وفي حساب وفي جنه ونار الناس نست انو في يوم عظيم ح نقيف فيه قدام رب كريم ح يسالنا وما ح نقدر نجاوب..

كدي تعالو نتناول جزء بسيط من البحصل في البلد دي:

#أول ظاهرة البنات الفي مواقع التواصل الاجتماعي ناخد التيك توك اولاً معقول بنات عندهم اهل بشوفو الشئ البعملو فيه دا وساكتين؟ بنات عرايا يظهرو مفاتنم بطريقه مبتزله جداً لدرجة تخلي الزول يشمئز منهم يتراقصو ولا يتفوهو بعبارات يعف اللسان عن ذكرها لا والعجب يتفاخرو بالمعصية البعملو فيها دي. التطبيق دا مفروض يتحظر في السودان عديل لما يجي واحد عشان ينزلو يكتبو ليه المحتوي دا محظور في بلدك نسبة لسوء الاستخدام ولقلة ادبكم البتعملو فيها دي.

اي واحدة بلعت ليها حبتين اتنفخت وفسخت وركبت ليها باروكة جزور تجي تلطخ وشها بكل أنواع الميك اب وتجي تقرفنا في المواقع الاجتماعية وبكل بجاحه تقول ليك انا مؤثرة في المجتمع.

مؤثرة بقرفك بقلة أدبك بسفالتك وانحطاطك.

لو تعرفو كمية الاحتقار والقرف البتلاقو من الناس اقسم بالله تندمو على البتعملو فيه دا.

التويتر كل العالم دي تستخدمو صح إلا نحن يا كافي البلا الانستغرام دا يا يمة ماسكاتنو كم واحدة كدا العيازو بالله من الطلعو برا البلد وبقو ماشين شمال ينشرو فيه وسخم وتفاهتم الفيس بوك مارك دا من زعلو من الشعب دا يقفل حسابات ناس كدا بدون ما ياخدو خبر زاتو واكيد ومؤكدا بيشتم فينا صباح ومساء ويمكن بعد شويه يطلعنا كلنا منو بس قبلها يرسل لينا رسائل يقول لينا فيها (شكيتم لله).

#تاني ظاهرة شااااااارع النيل وما ادراك ما شارع النيل بقي شارع الهرم بقى موقع ثابت لكل المحرمات دعارة شذوذ مخدرات اي شئ.

بنات يسهرو للصباح يعني يبيتو في الشارع مع الاولاد عشان يحضرو شروق الشمس يتعاطو عينك يا تاجر مافي رادع ولا زول يقول ليهم عينكم في راسكم.

البحصل دا نوع من انواع (التفسخ الاجتماعي) العبارة دي قاله لي هيثم اخوي لما سالتو البحصل دا شنو؟ السبب شنو؟ التفسخ الاجتماعي قاصد بيه الأسر البتكون من برا متماسكة ومن جوة منحله متفككه ما فيها رادع مافيها شخص يقود الأسرة ويوجهم للطريق الصحيح.

#تالت ظاهرة لبس البنات في الشارع العام متبرجات كاسيات عاريات.

مرة شفته منظر لواحدة كانت تقريباً ما لابسه وهي لابسه وجات ماره بقدام مجموعه من الرجال بصلو في المغرب الرجال ديل كلهم بسالو سؤال واحد البت دي وليها ما شافه وهي طالعه من بيتم كدا؟ وانا كنت بسال نفس السؤال.

#رابع ظاهرة الشواذ المثلين قوم لوط كان الأرض انشقت واخرجتم إعداد مهوله تخوف ممارسات غير أخلاقية علي الملأ مجاهرة بالمعصية دون خوف لا من مجتمع ولا من رب العالمين.

زمان كانو وين؟ هل كانو موجودين ونحن ما جايبين ليهم خبر ولا كانو عاملين خطة زي إسرائيل يشتغلو في الخفاء ويتكاترو ويظهرو كدا فجأه.

الموت دا أقرب للإنسان من حبل الوريد هم ما عارفين الكلام دا؟ ربنا سبحان وتعالى خلق الذكر ذكر والأنثى أنثى عشان يكملو بعض، طيب اللخبطه شنو؟ الواحد يتشبه بالنساء وهو ناسي انو ملعون من ربنا في كل مكان متواجدين وبكثرة بيحتفلو ويقيمو حفلات ومافي اي جهه بتحاسبم.

المصيبه أنهم بفتخرو بالمعصية دي ومتغلقلين في وسطنا وفي كتير ناس بتدعمم.

القونات لامنهم حوالينم ومفتخرات بيهم وفي منهم العاملين فيها (بهنقو) والناس بتجيبم في مناسباتم يهنقو ليهم.. البلد دي من البحصل دا ربنا ح يخسف بينا الأرض ويمحينا من الدنيا دي.

نحن محتاجين لمعجزة ترجعنا زي ما كنا نرجع تاني نتفاخر وسط الدول اننا بلد المال والرجال محتاجين ندرس اجيالنا الجايه الرجوله والشهامة والنخوة محتاجين نرجع لربنا ونتذكر يوم لا ينفع مال ولا بنون إلا من جاء ربه بقلب سليم. غياب الوازع الديني هو سبب كل البلاوي البتحصل دي لو كل واحد عرف دينو صح واتمسك بيه وخاف ربو وحسابو الحال ح ينعدل والبلا ح يترفع والخير يعم كل ربوع البلاد. نسأل الله السلامة والله يشفي السودان من المرض الصابو. افديك بالروح يا موطني فأنت دمي كلما اغتني بلااااادي انا إناء جدوى و مأوى أبي وتاريخ شعباً قوى ابى.

حفظ الله بلادي وجنبها شر الفتن ما ظهر منها وما بطن.