يا انت ويا انتي

كتب/ هديل محمد بخيت

ليه بتكذبوا علي بعض ؟ليه بتدعوا حاجه  انتوا ما حاسنها ليه؟

انت :

ليه بتطلق وعود ما بتقدر توفى  بيها؟ وتكذب علي بت الناس الغلبانة ليه وتعيشه  في وهم وانت كل هدفك انك تتسلي وتقضي وقت وهي تصدق وتبني آماله  واحلامه  عليك  وتجي في  لحظه تهدم كل حاجه  حلوه فيها  وتمشي تمارس  نفس الاعيبك مع واحده تانية  وتكون ناسي انك اخ وانك اب وانك حبيب وانك خال ولا عم ولا جد ان شاء الله.. ليه تنسي انو في مقوله  بتقول كما تدين تدان

وانك زي ما كسرته  قلب واحده حبتك ح يجي واحد  يكسر قلب  اختك  ولا بتك 

تفتكر ح تكون مبسوط لما تشوف اختك ولا بتك بتعاني ومحطمه  بسبب واحد؟

ليه ما تقول الحقيقة  من البداية تكذب ليش؟

يعني شنو تجي تقول ليها انتي حلوة وهي ما حلوة؟

يعني شنو تقول ليها بحبك وانت ما بتحبها؟

يعني شنو تقول ليها بوعدك افضل جنبك العمر كلو وانت بتكذب ؟

ليش بنكذب علي بعض يا جماعة ؟

انتي:

ليه تكذبي وتعلقي اكتر من شخص فيك؟ ليه تدعي مشاعر ما بتحسيها  وتخدعي شخص بحبك ح تستفيدي  شنو ؟

خسرانه انتي لما تكذبي علي فلان وعلان تخسري عمرك وحياتك والبراءة  الجواكي تخسري انوثتك وحيائك  وانسانيتك وكلو عشان شئ ما يستاهل  اصدقي مع نفسك عشان تصدقي مع غيرك  ما تخدعي شخص بحبك  ما بتحبي قولي ما تكذبي.

ليه بنكذب علي بعض ونجرح  بعض ليه ما نقول الحقيقة  دائماً  ليه ما نخلص ونوفي لبعض ونحترم بعض فيها شنو لو انا قدرتك وانت قدرتني؟؟؟ بسيطة ما فيها  حاجه

ليه ما نواجه بعضنا بعيوبنا ونصلحه ؟ ليه لما يكون بينا شيء  وتجي داير تنهي ما نواجه بعضنا  نهرب ليه ؟ليه نكون جبانين في مواقفنا ؟

انت وانتي  خلونا نبطل نكذب ونقول الحقيقة  ونحترم مشاعر الحب  و ما ندعي شئ نحن ما بنحسو خلونا نحترم بعض وما نكذب ولا نجرح الناس البحبونا.

..

… كسره صغيرة

(الحب احساس جمييل لما يكون صادق ).