عتاب
هديل محمد بخيت
الخاطر المكسور بكون زي القزاز يتكسر تاني ما بتصلح وما بتلم ويمكن يجرح الزول البحاول انو يلمو.
في ناس في حياتنا بكونوا قراب مننا شديد قرراب القرب الممكن نقول عليه ساكنين جوانا عديل ديل لما يكسروا خاطرنا بكون الوجع أضعاف أضعاف بنحس انو روحنا دي انتزعت مننا بقوة وانو قلبنا انشطر نصين وكأنو صاقعة ضربتنا من جوة حرقت كل شيء جميل.
في اللحظة دي لا دمعة بتنزل تخفف الوجع ولا آه بتطلع تشيل معاها شوية من الألم.
بنكون عبارة عن اجساد اتحولت لاصنام ما قادره تعبر ولا قادره تدي أي رد فعل بس أصنام.
تخيلوا صنم بيسمع ويشوف ويتنفس وما قادر يعبر أي تعبير ولا يتحرك أي حركة!
وجوانا بيتردد سؤال ليه؟
كسروا خاطرنا ليه ؟
حبيناهم لدرجة انو بقوا يشوفوا وجعنا وما يهتموا، لانهم عارفين ما بنقدر نبتعد عنهم ولا نتخلى عنهم؟
لما الوجع يكتر والصدمات تكتر والانكسارات تكتر والجفوة تكتر بكون ساهل علينا اننا ناخد قرار الابتعاد لما لا نهاية ساهل.
نبتعد عنهم ونراجع نفسنا ليه نحن سمحنا ليهم انهم يكسرونا ويحنوا ظهورنا ويهدوا حيلنا ليه؟
ليه اديناهم مساحة وحجم اكبر منهم؟
ليه نحن انتظرنا لحدي ما بقينا أصنام في حياة ناس ما قدرونا ولا في يوم اهتموا بفرحنا وحزنا؟
ليه ضحكنا ليهم لما مفروض ما نضحك ؟
ليه اعتذرنا ليهم في حين انو مفروض هم يعتذروا لينا؟
ليه اتزلينا وسكتنا وفضلنا متمسكين بيهم؟
ليه ما اتخذنا قرار الابتعاد من عاشر مرة كسرونا وهدموا كتير حاجات حلوة جوانا ناحيتهم؟
لية سامحناهم مرة واتنين وألف على اغلاط مفروض ما نسامح فيها؟
ليه حبيناهم من البداية؟
وليه وليه وليه وليه وليه ؟
عشنا عمرنا كلو بنديهم بدون ما ناخد منهم مقابل وهم للأسف متبلدين الإحساس فارغين من جووة
ومن برا انانين محبين لذاتم هم وبعدهم الطوفان كانوا السبب في اننا نصل لمرحلة اننا نحمل ليهم جوانا كره لا يوصف واحتقار .
مجرد شوفتم ولا سماع اسمهم نحس بالندم علي كل لحظة ضيعناها عليهم وعشانهم .
بس للأسف بكون فات أوان الندم وما بفيد بشيء
بكون ضاع عمرنا هدر وراحت سنوات عمرنا علي شيء ما بستاهل وما فضل لينا غير
جروح
احزان
كسور
الآم
وكتتتتير من الخيبات والعمر راح مننا وما فضل لينا غير الندم….
قبل ما يفوت الأوان خلونا نلحق نفسنا ونبتعد عن الناس البنديهم عمرنا وهم بيوجعونا ويكسرونا خلونا نبعد قبل ما نوصل لمرحلة ما نقدر نرجع منها تاني
المزيد من الاحداث
الإدمان ما مخدر بس
إليك
نحن بحاجة لبعضنا أحياء لا أموات ..